O consorcio provincial de Ourense contra os incendios constitúese o venres

O consorcio provincial de Ourense para o servizo contra incendios e de salvamento constituirase este venres, 31 de xullo, na sesión plenaria deste órgano, que se celebrará na Deputación de Ourense. O obxectivo deste ente é mellorar a coordinación da loita contra o lume, para o cal os consorcios dos parques de bombeiros da provincia pasarán a formar parte deste consorcio co fin de mellorar a xestión administrativa e técnica.

De tal forma, os catro consorcios comarcais cos que conta a provincia de Ourense -Valdeorras, Verín, A Limia e Carballiño-Ribeiro- serán disoltos para a súa integración no consorcio provincial, ao que cada un achegará os medios técnicos e recursos cos que conte.

A orde do día desta cita inclúe a constitución do consorcio, as eleccións de presidente e vicepresidente, o nomeamento de secretario e interventor e o informe sobre actuacións a seguir.