O Concello de Cangas prepara un plan xeral de actuación para tráfico

O alcalde de Cangas e responsable de Policía, Xosé Manuel Pazos, xunto coa Tenente de alcalde e concelleira de Obras e Servizos, MercedezGiráldez, e o xefe da Policía Local, Alberto Agulla, reuníronse hoxe para coordinar as actuacións en materia de tráfico e a sinalización viaria e establecer un plan xeral de actuación que afectará a diferentes aspectos do tráfico.

Neste mes, a súa prioridade será a vixilancia dos accesos ás praias, tendo previsto actuar de inmediato na praia dos Alemáns para retirar as pedras que dificultan o acceso de emerxencias e colocar no seu lugar sinais de prohibición que vixiará a policía.

Por outra banda, van manter o plan de actuación das fins de semana que afectan ao resto de praias de Hío e Aldán e a vixilancia de saída do cruce de Vilariño que establece o convenio con tráfico (a Garda Civil ten a do Viso). 

Nos vindeiros meses, estableceranse campañas de prevención de accidentalidade e de estacionamento nas que actuarán periodicamente, das que serán debidamente informados os veciños con anterioridade, e afectarán a: pasos de peóns e beirarrúas; áreas de discapacitados; zonas  de  carga  e descarga e servicios  públicos; ouao casco vello. Pretenden deste modo establecer un plan xeral de actuación en  materia de tráfico que  non existía ata  agora  e  que os veciños saiban puntualmente  cando e onde  se vai actuar, acompañados de campañas de sensibilización  para  condutores e usuarios da  vía.

Con relación ao casco vello, van estudar a posibilidade de modificar a ordenanza para facela máis práctica e efectiva, con apoio de medidas de sinalización que melloren a situación actual. Pretenden reducir os trámites tanto para veciños á hora de solicitala como para provedores e comerciantes.