O BNG critica a descoordinación de Xunta e Concello de Ferrol na crise da auga

Responsables comarcais do BNG en Ferrolterra denunciaron este martes a “descordinación total” na xestión da crise da auga por parte da Xunta e do Concello de Ferrol, que segundo os nacionalistas estaban máis preocupados de “botarse a culpa” que de solucionar a problemática que deixou durante máis de tres días a 150.000 persoas sen poder consumir auga da billa.

Coas restricións levantadas e os parámetros á baixa, o Bloque considera que é o momento de pedir responsabilidades. Así o fixeron esta mañá o alcalde de Fene, Juventino Trigo, e a responsable comarcal dos nacionalistas, Mercedes Tobío.

Segundo Trigo, botaron de menos “de forma escandalosa” un protocolo de actuación, para que os concellos actuasen “conxuntamente e non cada un polo seu lado como finalmente aconteceu”. Así mesmo, o alcalde resaltou que a Xunta “abandonou a súa responsabilidade e non houbo coordinación pola súa parte”, explicando que cada casa do concello se tivo que buscar a vida” chamando a provedores ou camións cisterna.

“ANSIAS DE PODER”

O rexedor fenés sinalou á Xunta, ao Concello de Ferrol e a empresa mixta de augas Emafesa como responsables de “empeorar o asunto”, pois segundo Trigo, se dedicaron á crítica antes de poñer solución á crise porque tiñan “demasiadas ansias de poder”.

De feito, o alcalde denunciou que nalgúns casos non se mantivo o acordado nas reunións entre alcaldes que se celebraron durante os días de desabastecemento e que iso propiciou que cada municipio actuase polo seu lado. “Hai que ser responsable e chegar a acordos antes de que cada alcalde anuncie as cousas por separado na prensa”, manifestou.

UNHA ÚNICA INVESTIGACIÓN

Mercedes Tobío sostén que “hai cuestións que se teñen que abordar inmediatamente”, pero que non vai necesario crear catro comisións de investigación porque “isto pode converterse nunha carreira entre administracións”.

“Necesitamos un equipo técnico e político que nos diga quen son os responsables”, subliñou, para engadir que se cometeron “erros de grande calado técnico” por parte da Xunta e do Concello de Ferrol, que non foron capaces de poñer en marcha “nin un só protocolo de actuación conxunto”.

“A Xunta deixou actuar e o Concello deixou facer”, resumiu. A responsable comarcal ha engadido que pedirán explicacións no Parlamento galego para que “a Xunta explique que fixo para que isto pasase en Ferrolterra” e faga públicos os datos oficiais, así como as medidas correctoras que ten previsto tomar para que isto non suceda nun futuro.

REMUNICIPALIZAR E REVISAR RECIBOS

O BNG cre que é o momento de apostar pola remunicipalización da xestión da auga a nivel mancomunado, para crear unha fronte común entre os alcaldes, unha vez que venzan os contratos de concesión, que no caso de Fene é ata 2018 e en Ferrol ata 2030.

Así mesmo, Juventino Trigo adiantou que se reunirá de novo cos rexedores de Ferrol, Narón, Mugardos e Ares para analizar se as empresas concesionarias rebaixarán a factura da auga este mes debido aos cortes na subministración.