O Auditorio Municipal de Ribadumia acolle o concerto Estamos Verán! co cantautor Xoán Curiel

O Concello de Ribadumia en colaboración coa Xunta de Galicia, organizou para este domingo 19 de xullo o concerto Estamos no verán!!!  a mans do cantautor Xoán Curiel e a banda Son+d2 dentro do programa de dinamización lingüística da Xunta falaREDES.

O concerto vai dirixido a nenos e nenas de 7 a 12 anos, aínda que a variedade de estilos musicais que presenta –con mestura de funk, rock, pop, reggae, bossa nova ou blues– e mais as coreografías propostas pola bailarina Marta Alonso divertirán tamén a toda a familia. Sempre con un único obxectivo: empregar o galego.

Estamos no verán!!! visitará durante todo o verán varias entidades da Rede de Dinamización Lingüística, e será este domingo cando chegue ata o Auditorio Municipal de Ribadumia a partir das 12:30 horas da mañá.

Esta é xa a cuarta edición do programa de dinamización lingüística falaRedes da Xunta de Galicia, unha proposta que naceu co obxectivo de facer propostas de ocio e tempo libre en galego e que está a percibir moi boa acollida por parte do público.

A música será este ano a encargada de fomentar a nosa lingua a mans de Xoán Curiel, un dos músicos galegos máis recoñecidos a nivel autonómico con tres discos en galego ás súas espaldas. 

Aínda que o seu estilo principal é o pop, tamén se sumerxe no reggae, a música de autor, o jazz… Nesta ocasión achegarase ata o noso Concello con un repertorio para os máis pequenos sen esquecer o importante que é a difusión da nosa lingua. 

A entrada é gratuíta.