Nova protesta de traballadores de Abanca na Coruña

Medio centenar de traballadores de Abanca concentrouse este xoves ante a sede da entidade financeira na Coruña para protestar por despedimentos realizados e para reclamar o cumprimento do acordo asinado en decembro entre a dirección e os sindicatos CC.OO., UXT e CSICA. Tras pancartas nas que se podía ler ‘Non máis despedimentos en Abanca’, os traballadores manifestáronse cun estrondo de bombos e sirenas contra o que consideran un “ataque ao persoal”.

“Está a vulnerarse o acordo”, dixo en declaracións aos medios o secretario xeral de UXT en Abanca, José Ramón del Pliego, en referencia ao acordo ao que a entidade financeira chegou o pasado mes de decembro coa maioría da representación sindical (CC.OO., UXT e CSICA) para renunciar a aplicar o ERE e establecer un novo modelo horario e retributivo.

Del Pliego denunciou que continúa o “goteo” de despedimentos. “Levamos cinco anos en tensión, non hai corpo que o resista. Non pode ser que veñas traballar pola mañá sen saber se te vai a chamar o xefe para dicirche que collas as túas cousas e non volvas”, censurou.

“É un incumprimento tan grave do que se asina que o único que nos queda, ademais da protesta, é chegar a expor diante dos xulgados a anulación do acordo, si pretenden seguir despedindo igual”, afirmou este representante de UXT.