Marea e toda a oposición asinan o acordo para a organización municipal da Coruña

O Goberno da Marea e os grupos da oposición -PP, PSOE e BNG- asinaron este luns o acordo para a organización municipal no Concello da Coruña, tras sumarse os populares. A sinatura deste documento chega despois de que nun primeiro pleno celebrado o día 11 os concelleiros de PP e PSOE rexeitasen a proposta de organización da Marea, que si contou co voto a favor do BNG. Dende entón, os grupos municipais retomaron as negociacións que culminaron neste pacto que foi subscrito este luns polos voceiros dos catro grupos con representación en María Pita.

En declaracións aos medios tras a sinatura do acordo, o alcalde da Coruña, Xulio Ferreiro, indicou que este pacto confirma a existencia dun “tempo novo” no Concello da Coruña, marcado pola “transparencia” á hora de gobernar e pola redución de custos para as arcas municipais.

Ferreiro resaltou que o acordo fixa “recursos abondos” tanto para o Goberno coma para a oposición e confía en que a proporcionalidade na repartición de dotacións e responsabilidades se manteña durante os próximos mandatos.

Así, a través deste acordo todos os órganos colexiados municipais van ter representación dos grupos da oposición, o que significa un “feito histórico” na casa do concello herculino, segundo subliñou Ferreiro.

“Fíxose un esforzo para chegar a un lugar de consenso”, manifestou Ferreiro, que informa que este acordo se levará ao pleno municipal deste xoves, ás 17,00 horas. Tras este acordo rubricado, a celebración das sesións quedará fixada para o primeiro luns de cada mes, pola tarde.

OPOSICIÓN

Pola súa banda, os grupos da oposición trasladaron a súa conformidade co acordo asinado este luns polas catro formacións políticas que alcanzaron un consenso sobre unha proposta que implica que 25 dos 27 concelleiros cobrarán un soldo municipal.

A voceiro do PSOE, Mar Barcón, que deixará de exercer como tal, aínda que se manterá como concelleiro, se mostrou “satisfeita” polo acordo e agradeceu á partidas políticos a súa vontade de “acordo unánime”.

Dende o PP, o seu voceiro Carlos Negreira recordou que a Marea non conta coa maioría absoluta para gobernar e considera que este acordo mellora a “cogobernabilidade” da cidade. O exalcalde cre que a repartición de fondos para goberno e oposición asegura “un mínimo” para poder cogobernar e “velar polos intereses de todos os veciños”.

“Chegouse a un acordo mellor que a primeira proposta que levou a Marea, afirmou a única concelleira do BNG, Avia Veira, aludindo ao horario dos plenos e a presenza da oposición en órganos colexiados e comisións.