Ignacio Cabanas López foi nomeado un dos 100 mellores financeiros de 2015

Ignacio Cabanas tras recibir o premio

Ignacio Cabanas López, director financeiro de Altia, foi galardoado como un dos 100 mellores financeiros de 2015 na 7º edición dos premios que organiza a publicación Actualidad Económica en colaboración coa consultora  KPMG. A entrega de premios realizouse nun acto celebrado no Hotel Ritz de Madrid, que estivo presidido por Álvaro Nadal, director da Oficina Económica da Presidencia do Goberno.

O obxectivo destes premios é recoñecer a boa xestión dos responsables das áreas financeiras de compañías españolas. Nesta edición valoráronse especialmente calidades no desempeño nas áreas de transformación, estratexia, calidade da información, operacións relevantes e internacionalización.

Á mantenta do galardón, Ignacio Cabanas expresou que “aínda que é un recoñecemento individual, o premio recoñece unha traxectoria empresarial e o labor conxunto  dun grupo de profesionais moi cualificados que están a levar a Altia a situarse como unha das compañías referente no sector das Tecnoloxías da Información”.

Mención especial aos grupos de interese

Xunto a isto, Cabanas expresou o seu desexo de dedicar o premio aos grupos de interese de Altia, “especialmente aos nosos clientes, que seguen apostando e crendo en nós ano tras ano; aos nosos investidores e accionistas, por darnos a súa confianza en momentos tan convulsos como os actuais  nos mercados financeiros, en particular, e na economía, en xeral; e, por suposto, aos meus compañeiros, que coa súa dedicación, profesionalidade e calidade no traballo, están a facer posible a consolidación deste proxecto”.

Ignacio Cabanas é licenciado en Economía pola Universidade da Coruña e a súa traxectoria profesional estivo sempre ligada a Altia.

Sobre Altia

Altia é unha empresa especializada en servizos avanzados de alto valor engadido no sector TIC que desenvolve, desde a súa orixe en 1994, proxectos en diversos sectores de actividade como o industrial, o financeiro, o sector servizos, o ámbito das telecomunicacións ou as administracións públicas. Desde o 1 de decembro de 2010 as súas accións cotizan no MAB no segmento de empresas en expansión.

A empresa conta con centros de traballo na Coruña, Vigo, Vitoria, Santiago de Compostela, Madrid, Valladolid, Alacante e Toledo.