Galiza Nova denuncia a falta de colaboración do Concello de Santiago no homenaxe a Rosalía e Castelao

O secretario de Galiza Nova, Alberte Mera, denunciou na presentación da homenaxe en Santiago a Rosalía de Castro e Castelao o próximo 24, véspera ao Día da Patria, a falta de colaboración por parte do Concello compostelano, dirixido por Martiño Noriega, de Compostela Aberta. Acompañado polo secretario de Organización do BNG, Bieito Lobeira, Mera sinalou que, ademais, este ano ao contrario que o anterior, a organización xuvenil do BNG tivo que depositar unha fianza de 1.000 euros para poder utilizar o Parque de Bonaval, lugar onde transcorre o acto antes de acudir ao Panteón de Galegos Ilustres.

Dende Galiza Nova “lamentaron” esta taxa, que, consideraron, “para unha asociación xuvenil é difícil de afrontar” por un acto dunha hora nun espazo público. Mera tamén destacou que o goberno municipal tampouco lles facilitou un punto de luz nin un xerador eléctrico.

Pola súa banda, o secretario de Organización do BNG agradeceu a Galiza Nova a organización da homenaxe. “Son 20 anos ininterrompidos de popularización das figuras de Rosalía e Castelao”, dixo. Tamén salientou a colaboración organizativa e loxística da asociación no Festigal a noite do 24 de xullo.

Lobeira destacou o labor da asociación xuvenil por “inculcar” estas dúas figuras do nacionalismo galego de “forma desacomplexada e desaliñada”. Tamén sinalou que é “curioso” que sexan organizacións xuvenís as que “poñan en valor todo o seu inmenso legado” nunha iniciativa que completa a axenda de conmemoración do 25 de xullo, “día de demostración de que o pobo galego existe, ten dereitos e os sabe exercer”.

HOMENAXE DA XUVENTUDE A ROSALÍA E CASTELAO

Este acto de homenaxe a ambos os dous escritores galegos terá lugar no Parque de Bonaval a partir das 17,30 horas do venres 24. “Con humor, música, arte e cultura queremos homenaxear a Rosalía e Castelao”, así describiu o secretario de Galiza Nova as actividades programadas.

Ese día contará coas intervencións políticas do secretario de Organización do BNG, Bieito Lobeira, a militante máis nova de Galiza Nova, Argantel Kerdudo, e o secretario xeral da asociación xuvenil, Alberte Mera. No terreo musical, actuarán dous grupos galegos, Loaira e Poetarras, que se define como un grupo “arteterrorístico”, de letras combativas e satíricas.

Ao final das actividades do acto homenaxe procederase a depositar a ofrenda floral en honra a Rosalía de Castro e Castelao no Panteón de Galegos Ilustres, construído no interior do convento San Domingos de Bonaval.

EMIGRACIÓN DA XUVENTUDE GALEGA

O secretario de Galiza Nova aproveitou a presentación para reivindicar a situación dos “100.000 mozos que emigraron nos últimos cinco anos dende que Feijoó está na Xunta”. Unha mostra, segundo Mera, de que “o pensamento de nación política de Rosalía e Castelao seguen de vixencia”, pois as dúas figuras galegas “denunciaban que Galicia non pode xerar traballo por causa desa dependencia a España que obrigaba a emigrar”.

Así o fixo tamén o secretario de Organización do BNG, quen identificou a Galicia como “o país máis avejentado de Europa”. E encamiñou a “vía real” para “afrontar o problema” nunha “vía propia galega, democrática e popular nacionalista”.

MANIFESTACIÓN UNITARIA

Por outra banda, Lobeira abordou os plans da súa formación para a manifestación polo Día da Patria. Ratificou que o BNG se vai adherir á manifestación “unitaria” que, considerou, debe converterse nunha “demostración da vigorosidade do pobo galego na defensa dos seus dereitos” e é un “paso moi importante” na estratexia “sen submisión” a ningunha estrutura política “española ou allea a Galicia”.

O secretario do BNG apostilou que o pobo galego debe ser o “actor protagonista” do “debate aberto” sobre o “dereito dos pobos” que -vaticinou Lobeira- “posiblemente” déase durante as “próximas eleccións xerais”.