Entréganse os premios aos participantes da “V Feira da Tapa”

Entrega de premios

A quinta feira da tapa rematou en Cangas o pasado 5 de xullo e esta tarde outorgáronse os premios aos gañadores. Recordamos que a feira prometía premios tanto para os establecementos como para os comensais.

Os establecementos, un total de 41 locais participantes da vila de Cangas, optaban a dous recoñecementos: “a tapa popular”, elixida a través dos votos dos comensais; e a “tapa do xurado”, elixida por un grupo de expertos baseándose en elementos como a presentación, a orixinalidade ou os valores culinarios. Todos eles, ademais, recibiron un diploma acreditativo.

Os tres premiados por parte do xurado foron:

– 1º premio: Heladería Fiorentina

– 2º premio: Tapería Martinus

– 3º premio: O Chincholo

Os tres premiados populares foron:

– 1º premio:Taberna andaluza “O Jabuguito”

– 2º premio: Casa Porrón

– 3º premio: Restaurante Sol Poñente

Ambos premios teñen a mesma validez, aínda que Merchi Rodal, “larpeira” da TVG, quixo destacar a importancia que tiña a tapa popular, xa que “se escolle entre moitas persoas”. 

Este ano, a feira aumentou as ventas nun 125%, segundo apuntaba a concelleira de Turismo, Tania Castro, vendéndose un total de 70.000 tapas. Recoñeceu que este tipo de eventos son moi necesarios para a vila e que fan “comunidade, movemento”.

A quinta edición da feira trouxo consigo moi bos resultados, “comeza a consolidarse e acada boa repercusión na hostalaría” afirmaba o organizador da feira, Anselmo Rodríguez. Ademais, quixo recordar a dinamización que se levou a cabo paralelamente no segundo andar da Praza de Abastos.