Darío Campos espera que o alcalde rebelde recapacite para recuperar o goberno provincial

O voceiro socialista na Deputación de Lugo e alcalde da Pontenova, Darío Campos, confinou en que o rexedor rebelde polo que o ente provincial rematou en mans dos populares, Manuel Martínez, “recapacite” co fin de recuperar o goberno provincial. Campos foi o candidato de última hora que presentaban os socialistas á presidencia da Deputación de Lugo polo veto do BNG ao rexedor de Becerreá, que está imputado.

Malia que Martínez se votou a se mesmo e despois, co seu voto, en branco favoreceu a entrada dos populares na Deputación, o alcalde socialista integrouse no grupo provincial do PSOE, composto por once deputados.

Campos destacou que a integración se produciu sen problemas. “Sen ningún tipo de problema, nin de petición”, abundou.

Con todo, confiou en que “recapacite” co fin de presentar unha moción de censura no ente provincial, e recordou que “as negociacións seguen abertas” co BNG e con Manolo Martínez”. “A ver se chegamos a algunha conclusión. A ver se, partindo de nada, conseguimos recuperar a deputación, ese é o noso obxectivo”, agregou.

EXPEDIENTE

O PSdeG decidiu abrirlle un expediente disciplinario a Martínez por non acatar “unha decisión política” do partido, aínda que en paralelo apelou aos seus 40 anos de militancia socialista para intentar que cambiase a súa actitude e colaborase na reedición “dun goberno progresista” na Deputación de Lugo.

De feito, nos últimos días foron moitos os cargos socialistas, encabezados polo seu xefe de filas, José Ramón Gómez Besteiro, e, tamén do BNG os que mostraron o seu interese en sacar adiante unha moción de censura para desbancar o PP da institución. Para iso, é necesaria a suma dos 11 deputados do PSOE e os dous de formación frentista.

Coa incorporación de Manuel Martínez ao Grupo Provincial Socialista, as opcións de facer valer a maioría absoluta que reúnen socialistas e nacionalistas para desaloxar a Elena Candia do Pazo de San Marcos mantéñense intactas en termos aritméticos.

Así as cousas, o escollo reside na postura do rexedor de Becerreá, quen se mantivo firme nas súas últimas declaracións públicas en que só participará nunha operación destas características se el asume a presidencia, cargo que xa pretendeu en 2007.

SUBHASTA COCHE

Por outro lado, o voceiro socialista tamén aproveitou para censurar “os primeiros arranques” do goberno presidido pola popular Elena Candia, que anunciou que subhastará o A-8 que tiña como vehículo oficial o seu predecesor, o socialista Gómez Besteiro e destinar ese diñeiro a fins sociais.

“Eu non sei que sentido ten vender un coche cos anos que ten. A nivel económico vai supoñer moi pouco. É unha medida absurda, isto é de cara á galería e á prensa para vender o tema da austeridade como fixo Feijóo no seu momento. É unha política calcada”, recriminou.

Campos apelan a que Candia “se equivoca co revisionismo” e invoca o exemplo de cando el mesmo accedeu á alcaldía da Pontenova.

“Recordo que, cando entrei no concello, non busquei nada debaixo das alfombras, intentei poñer a traballar por e para os veciños, e eu creo que o que está feito con erros e acertos, feito está”, concluíu.