Circo e música de raíz na fin de semana en Redondela

A programación cultural de verán, organizada pola Concellaría de Cultura, continúa esta fin de semana con circo e dous días de concertos con música de raíz na praza da Casa da Torre. O venres 10 de xullo, ás 22.00 h, a compañía ASACOCIRCO presentará o seu espectáculo LUME. A compañía está formada por Joao Alvim e Miriam Crespo, dous malabaristas con máis de 13 anos de adestramento, que conseguen impresionantes efectos visuais a través do lume e as luces. É un espectáculo para todos os públicos no que desenvolven diferentes técnicas, efectos visuais e moito humor. Pura acción para divertir e impresionar.

O sábado 11 de xullo, ás 22.00 h, chega a quenda do concerto de Emilio Rúa e as pandeireteiras Xestreu. O músico e cantautor Emilio Rúa e as cantareiras e pandeireteiras Xestreu únense nun proxecto común e compartido, na que unen dous tipos de música: a canción de autor ou moderna coa canción popular ou tradicional 

O proxecto inclúe unha escolma de cancións populares da música galega e outras partes do mundo cunha nova revisión das mesmas, un novo xeito de divulgar e achegar ás novas xeracións a nosa música.

Os dous espectáculos inclúense na programación de Cultura no Camiño a través da AGADIC.

E o domingo 12 de xullo, ás 22.00 h, e patrocinado pola Deputación de Pontevedra, chega a actuación da orquestra folk MOXENAS MUSICAL GALEGO.

Esta agrupación formouse en Vigo no ano 2003, como homenaxe ao mítico gaiteiro Nazario González “Moxenas” e como continuación do labor que este iniciou no movemento veciñal vigués e na formación na música tradicional dos rapaces e rapazas das distintas entidades culturais de Vigo e a súa bisbarra. 

Composto por máis de trinta mozos e mozas (con idades comprendidas entre os 14 e os 23 anos), Moxenas Musical Galego é hoxe, logo de máis de 10 anos de existencia, un proxecto consolidado e un referente no actual panorama da música tradicional galega.

A dirección desta orquestra folk está a cargo do prestixioso músico Xosé Oliveira (compoñente do grupo Noitarega), que consegue un orixinal formato musical baseado na mestura de instrumentos tradicionais galegos (gaitas, pandeiretas, tamborís, etc.) con outros contemporáneos (saxo, teclados, baixo eléctrico, violín ou frauta).

A asistencia a todos os espectáculos é libre e de balde.