Cinco grandes adegas da D.O. Ribeiro patrocinarán as etapas da “52ª Regata Ribeiro rías de Galicia”
Cinco adegas excelentes da Denominación de Orixe Ribeiro (Bodegas Villanueva, Pazo Casanova, Finca Viñoa, Casal de Armán e Viña Costeira)coparticiparán no patrocinio da “52ª Regata Ribeiro Rías de Galicia”, que este ano se estrenacon o nome do Ribeiro en base ao acordo quinquenal entre este D.O. e o Real Club Náutico de Vigo, organizador da competición.
A Regata, que xa confirmou a inscrición de sete dos últimos campións, celébrase entre o 13 e o 16 de agosto. Unha das grandes novidades é que cada adega correrá co patrocinio dunha etapa. Así, Bodegas Villanueva patrocinará a de saída entre Vigo e Sanxenxo. Pazo Casanova e Finca Viñoa compartirán o patrocinio da segunda etapa entre Sanxenxo e A Pobra do Caramiñal. Casal de Armán será a encargada de patrocinar a terceira etapa entre A Pobra e Combarro. Pola súa banda, Viña Costeira patrocina a última etapa entre Combarro e Vigo.
O programa da Regata arrinca esta semana co evento solidario “Cata & Mar & Música”, cuxo lema é “Embárcate por unha boa causa”.Os fondos recadados pola venda de entradas (3 euros por persoa) destinaranse á Asociación Española Contra o Cancro.
A primeira Cata solidaria celebrarase o vindeiro xoves 30 co patrocinio e os viños de Adegas Villanueva. A segunda, correspondente ao martes 4 de agosto, estará protagonizada por Pazo Casanova e Finca Viñoa. Casal de Armán apadriñará a terceira, o xoves 6 de agosto. A Viña Costeira correspóndelle o peche, o martes 11 de agosto, xusta antes de recibir aos máis de 500 regatistas que xa están inscritos nesta edición da 52 Regata Ribeiro Rías de Galicia.
Co seu patrocinio, o Ribeiro, a Denominación de Orixe máis antiga de Galicia e pioneira das españolas, retoma unha tradición marítima que se remonta a Cristóbal Colón ou ás exportacións históricas a Inglaterra, Escocia, Irlanda ou Holanda, entre outras. A lema da competición, “Novos Horizontes”, non só fai referencia ao cambio de nome da proba, senón que constitúe unha declaración de intencións: tanto o Ribeiro como a Regata atópanse en fase de expansión en base a valores como a innovación, o atrevemento e a procura da excelencia.