Asínanse os contratos de limpeza, desbroce e mantemento de cunetas e de mantemento de espazos urbanos de Carballo

Sinatura do contrato de limpeza de cunetas

A Casa do Concello vén de acoller o acto de sinatura dos contratos administrativos de servizos de “Mantemento de espazos urbanos do Concello de Carballo” e de “Limpeza, desbroce e mantemento de cunetas dos viais das parroquias de Carballo” por un importe total de 85.889 euros e que veñen de ser adxudicados esta semana en sesión ordinaria da Xunta de Goberno Local. No primeiro caso, o prezo de adxudicación foi de 33.859 euros sobre un valor estimado do contrato de 48.370 euros, e o prazo de execución dun ano, sen posibilidade de prórroga. O máximo de horas de traballo manual será de 580 horas; e o máximo de horas de traballo mecánico será de 1.150. Os traballos consistirán na limpeza de maleza, residuos, etc., así como na sega de herba mecánica e manual dos seguintes espazos urbanos: Paseo do Bosque, contorna do Cemiterio municipal, aparcadoiros de praias, Festa do Bosque, Circuíto de Motor, Férvedas de Entrecruces e de Rus, Ruta das Férvedas, Ruta dos Muíños, vertedoiro do Polígono, Polígono industrial, Parque Parga Pondal, Muíño do Quinto, recollida de polas da poda, área recreativa de Barís e as seguintes parcelas urbanas municipais: Riotorto, San Cristovo, Pedra Furada, Rúa Brasil, Rúa Muíño, Rúa Camelias, Gran Vía, Rúa Luis Braille, Avenida do Ambulatorio e Fórum. Tamén os Campos da Festa de Rus, Artes, A Brea, Ardaña, Aldemunde, Rapadoiro e Braña do Muíño (Tarambollo). E, por último, os baldíos de Calvos, Sísamo, Bértoa e Portopaio.

No caso do contrato de “Limpeza, desbroce e mantemento de cunetas dos viais das parroquias de Carballo”, o prezo de adxudicación foi de 52.030 euros sobre un prezo base de licitación de 58.500.O prazo de execución da limpeza será dun máximo de dous meses, cunha prestación do servizo de mantemento por un prazo de cinco meses. A prestación do servizo empezará cada ano o día 1 de xullo e rematará o 30 de novembro. Os traballos consistirán no desbroce e limpeza dos laterais dos viais, nun ancho de 2,5 m en cada unha das marxes. Para o desbroce de matogueiras e herbas requiriranse peóns con desbrozadoras de mán (de gasolina, fouces, motoserra, etc.) e tractores con desbrozadora de cadeas ou martelos e segadoras.