Apertura da 10ª Feira de Oportunidades do Morrazo

Mañá venres día 3 de xullo ás 18:00h procederase á apertura da décima Feira de Oportunidades do Morrazo, o gran escaparate do verán no que o sector comercio da nosa comarca ofrece descontos exclusivos nunha ampla oferta de produtos.

A carpa xa está instalada nas inmediacións dos Xardíns do Sinal (Alameda Nova) en Cangas, e conta cunha extensión de preto de 1000 m2 en forma de T. A esta hora remátase cos últimos detalles do interior para que os 25 stands participantes poidan entrar a organizar a súa mercancía. Lembramos que os clientes atoaprán nesta feira a mercancía en stock que os comercios participantes de Bueu, Cangas e Moaña exporán a prezos dun 40% en adiante.

Os visitantes interesados, terán tres días para facer as súas compras. A 10ª Feira de Oportunidades permanecerá aberta dende o Venres 3 ata o Domingo 5 de xullo nun horario amplo, sobre todo á tarde, para a súa comodidade:

– VENRES 3: APERTURA ás 18:00h, ata as 23:00h.

– SÁBADO 4 E DOMINGO 4: de 11:00h a 14:00h e de 18:00h a 23:00h.

Coincidindo co período de Rebaixas, a feira supón unha alternativa ás grandes superficies, así como un punto de presentación dos establecementos da nosa comarca a todos os visitantes.

Lembramos que para esta edición os clientes poderán optar aos máis de 500 agasallos que reparte a organización a través duns boletos “rasca e gaña” que recibirán coas súas compras. Ademáis, poderán facer compras con tarxeta, como se mercasen no seu establecemento habitual, dado que os expositores contarán con TPV inalámbrico.