A XVI Festa do Cabalo de Teixeiro contará con espectáculos de doma, baile e acrobacias
O Concello de Curtis organizará este domingo, día 2 de agosto, a XVI Festa do Cabalo, celebración que se foi consolidado nos seu quince anos de vida como unha das máis atractivas para os afeccionados do mundo ecuestre polas exhibicións, concursos e espectáculos que se desenvolverán durante todo o día en Teixeiro.
Este ano, unha das grandes novidades será a presenza dos chamados Magos da Equitación, que mostrarán ao público de Galicia por primeira vez un espectáculo de coreografías de xinetas e amazonas con cabalos de pura raza, no que se mesturará doma con baile e acrobacias.
O espectáculo será o broche final dunha xornada festiva que reunirá no pobo de Teixeiro a gandeiros de toda Galicia e por centos de afeccionados ao redor dos concursos de andaina, trote e morfoloxía, con premios que ascenden a preto de 5.000 euros. Ademais, celebrarase o Campionato Galego de Andaina, puntuable para o campionato galego desta modalidade.
Curtis, o municipio coruñés con maior número de gandarías
Un dos puntos fortes desta xornada, que dará comezo ás 10 da mañá, serán os exemplares de pura raza galega ao ser Teixeiro o certame co maior número de cabalos que reúne en concurso. Hai que destacar que Curtis é o municipio da provincia da Coruña con máis gandarías de pura raza galega, cun total de 20 criadores.
As probas celebraranse nun gran campo destinado a acoller as actividades ecuestres, situado detrás da casa consistorial de Teixeiro. A zona conta cunha ampla zona de aparcadoiro para facilitar a asistencia aos actos.
A Festa do Cabalo, organizada polo Concello de Curtis, conta coa colaboración da Xunta de Galicia, a Deputación da Coruña, o Clube Hípico de Teixeiro, a Federación Galega de Hípica e a Asociación Pura Raza Cabalo Galego.