A Xunta reprocha ao reitor da Coruña crear un debate sobre o seu financiamento

A Consellería de Cultura, Educación e Ordenación Universitaria reprochou este mércores ao reitor da Universidade da Coruña (UDC), Xosé Luis Armesto, que creou un “debate artificial” acerca do seu financiamento, despois de que a UDC presentase no día 30 de xuño un recurso contencioso-administrativo á Xunta polo que lle reclama 8,8 millóns de euros.

O departamento que dirixe Román Rodríguez lamentou que a reitoría responsabilice a administración galega “dos seus problemas financeiros”, que se deben a “unha interpretación errónea das regras do xogo”, segundo recolle nun comunicado.

Desta forma, a Xunta afirma que “non lle debe cantidade ningunha á universidade” máis que a correspondente ás transferencias mensuais, polo que, no caso de que o Tribunal Superior de Xustiza de Galicia (TSXG) aceptase o recurso, a Consellería indicou que “non se lle transferiría ningún fondo”, senón que habería que subtraelo da repartición feita a outras universidades.

“MALA IMAXE PÚBLICA”

Pola súa banda, acusou de “graves” as declaracións do reitor aos medios de comunicación. En ente sentido, observou que a universidade podería ver afectada a súa imaxe pública, cunha “peor captación do estudiantado, desconfianza de provedores e unha imaxe pobre de xestión”.

A consellería apuntou que as tres universidades galegas poden acceder á comisión de seguimento, un órgano lexitimado para resolver calquera discrepancia, e onde o criterio de interpretación da universidade sobre os fondos foi rexeitado “sistematicamente” por todos os membros.

Por iso, acusou ao reitorado de judicializar o Sistema Universitario de Galicia (SUG) e “alimentar un debate ficticio e estéril”.

A UNIVERSIDADE QUE MÁIS DEPENDE DA XUNTA

Así mesmo, segundo a Xunta o resto das universidades do sistema (SUG) aplicaron “correctas medidas organizativas e económicas”, a diferencia da Universidade da Coruña, que foi “a única” que reproba a repartición dos fondos estruturais.

“A UDC é a universidade que presenta unha maior dependencia das trasferencias da Xunta de Galicia, mentres que as demais cada vez captan máis recursos externos”, afirmou este departamento.

Ao respecto, aclarou que a Xunta mantén unha actitude de colaboración coas tres universidades galegas co obxectivo de planificar e coordinar a súa actuación, para “conseguir unha docencia e investigación de calidade”.

Ademais, recordou que realizou distintas reunións cos representantes da UDC, nas que se trataron temas como o plan de axuste presupostario, acelerar a repartición dos fondos estruturais, explorar vías bilaterais de financiamento adicional ou cofinanciar actuacións da universidade.