A xornada do martes será completa para os máis pequenos de Bueu

A Praza Massó encherase mañá de actividades para os máis pequenos. Tras as actividades inclusivas que desde as 11 organiza Argo Navis con gincana de xogos, coreografías de bailes ou obradoiro de marcapáxinas, a partir das 21 horas a compañía Titirimaña presenta “Carmiña Brañolas e as tarrañolas máxicas”, un espectáculo de monicreques que conta a historia de dous amigos, Carmiña e Charrasquiño, que adoran a música e os contos; van polos camiños do mundo enteiro, aprendendo historias e cancións para alegrarlle a vida á xente. Na súa viaxe descubrirán máxicas personaxes e instrumentos moi antigos que tocarán cos rapaces, trasladándose a un mundo fantástico, onde todos terán que axudar aos habitantes dunha pequena aldea e enfrontarse a un ogro para recuperar a auga que tanta falta nos fai.