A reserva de biosfera estrea Comité Científico

A reserva de biosfera As Mariñas Coruñesas e Terras do Mandeo dá un novo paso na súa estrutura participativa coa creación do denominado Comité Científico. É un órgano formado por expertos de recoñecido prestixio no territorio e que a título particular asesorarán e acompañarán á reserva na execución do seu plan estratéxico.

O Comité Científico constituíuse onte no Pazo de Lóngora (Oleiros), sede do Instituto de Medio Ambiente da Universidade da Coruña. Aínda que algúns dos membros non puideron acudir a esta constitución, o Comité estará composto por expertos en diversas materias como a bioloxía, economía, patrimonio cultural, sociología, medio ambiente, xeografía, ou paisaxe.

Na reunión de onte decidiuse unha organización por comisións, para agrupar varias liñas de traballo. Por exemplo, haberá unha comisión sobre a marca de calidade e a súa comercialización e outra sobre a posta en valor do patrimonio cultural.

O Comité Científico manterá reunións periódicas, con maior frecuencia das comisións. “Non é un órgano figurativo, terá un papel moi importante para dirixir o traballo da reserva”, afirma o presidente, José Antonio Santiso, que asistiu tamén a esta primeira reunión do órgano.

Santiso enxalza o “forte compromiso” demostrado polos membros do Comité, que o compoñen de forma altruísta. “Isto amosa a implicación total de todos vos sectores dá comarca coa reserva”, asegura.