A Orde do Camiño celebra o seu 19º Capítulo Ordinario o vindeiro sábado

Como indican os estatutos da Fundación Orde do Camiño de Santiago, e desde fai 19 anos, o sábado anterior á celebración do Día do Apóstolo, 18 de xullo, esta entidade celebrará un novo capítulo ordinario no que serán investidos 35 novos membros procedentes de 6 países (Ecuador, España, Estados Unidos, China, Italia e Portugal) que se sumarán aos máis de 1000 cabaleiros e damas cos que conta xa en todo o Mundo.

Os detalles do programa foron presentados hoxe polo comité executivo da Orde, integrado polo presidente e gran mestre, Miguel Pampín, o vicepresidente executivo e portavoz, Alejandro Rubín e o secretario xeral, Alfonso Barcia.

Este capítulo ordinario, no que participarán activamente máis de 200 persoas terá dous días de duración, arrincando en Santiago coa asistencia á misa do peregrino na Catedral, onde un dos oferentes en representación dos novos membros será Juan Manuel Vieites Baptista de Sousa, secretario xeral de ANFACO-CECOPESCA. Tras este inicio os participantes realizarán un tramo do Camiño Francés desde a Lavacolla.

O acto central de investidura será ás 18.30 h. na Capela Real do Hostal dos Reis Católicos, e contará cunha novidade que será a entrega da Medalla Conmemorativa aos membros que cumpriron máis de 15 anos formando parte desta organización cuxo obxectivo principal é a promoción das peregrinacións a Santiago, “cunha clara vocación internacional” como destacou o presidente da Orde, Miguel Pampín. 

A segunda parte do programa do día 19 desenvolverase no municipio de Melide, onde a Orde adquiriu o “Bosque dos Peregrinos”, lugar no que cada un das novas damas e cabaleiros plantarán a súa respectiva árbore, situado nun tramo do Camiño.

Entre os novos membros que entrarán a formar parte no capítulo deste sábado atópanse destacados representantes empresariais, entre eles, o presidente da Asociación de Empresarios Galegos en Estados Unidos e director cinematográfico, José Manuel Brandariz, o presidente da liga Chinesa en Portugal, E Ping Chow, o vicepresidente de Openbank e presidente de Bansalud, Enrique García Candeas, un representante da Brigada da Garda de Finanzas de Italia, Valentino Pisegno ou o presidente do Centro Cirúrxico Garden Center de Estados Unidos, Ricardo Esteban Rodríguez.