publicidade hoxe

A oficina de turismo de Ribadumia recibe máis de 300 visitas no mes de xullo

PUBLICADO EN: Noticias de GaliciaRibadumia
A-
A+

A oficina de Turismo de Ribadumia recibiu este mes de xullo máis de 300 visitantes interesados en coñecer en profundidade o noso municipio, e como era de esperar, a Ruta da Pedra e da Auga continúa a ser a principal demanda turística.

Dos visitantes que se achegaron, continúan sendo a súa gran maioría de Madrid, Andalucía e de Galicia –sobre todo de A Coruña-.  Tamén se achegaron turistas de diferentes puntos de Europa e peregrinos que selan en Ribadumia como parte do Camiño Portugués. 

A Ruta da Pedra e da Auga continúa sendo o recurso máis demandado entre os visitantes. O interese nos seis muíños restaurados cos que conta o tramo de Barrantes non só se atopa nos muíños en si mesmos, senón na beleza da paisaxe que os envolve característica do corazón do Salnés.   

Outros puntos moi demandados son tamén os pazos e as bodegas do municipio, a gastronomía –que rende homenaxe ó pan do municipio o vindeiro 8 d agosto-, as rutas de sendeirismo ou o interese de moitos visitantes en coñecer en profundidade toda a zona do Salnés.

Cambio de horario da oficina 

Por outro lado, O Concello de Ribadumia quere informar que a oficina de turismo cambiará o seu horario a partir desta semana. O horario  continúa a ser de martes a domingo; pero en lugar de abrir ás 11:00 e pechar ás 21:00, a oficina abrirá de martes a venres de 10:00 a 14:00 e de 16:00 a 20:00 horas.  O fin de semana continúa co horario de 11:00 a 14:00 horas.

Recordamos que a oficina, ademais de ofrecer asesoramento turístico, tamén organiza visitas guiadas gratuítas polas rutas do municipio. Os interesados poden poñerse en contacto coa oficina no seguinte número: 986710499, e será o guía o encargado de organizar os grupos.

30 de xullo de 2015 | 19:44 • Sen comentarios

Comentarios pechados.