A Marea Atlántica envía unha carta aos grupos municipais da Coruña para chamar ao consenso

O alcalde da Coruña, Xulio Ferreiro, anunciou que este martes a Marea Atlántica remitiu unha carta aos grupos políticos municipais para chamar ao “consenso” nas negociacións e poder alcanzar un acordo para a organización municipal. A preguntas dos xornalistas, Ferreiro explicou que o consenso pasaría porque PP e PSOE volvan á “lóxica” e renuncien a peticións “inasumibles”.

Os concelleiros do PP e do PSOE rexeitaron no pleno de organización a proposta de dedicacións e retribucións da Marea, que si contou co voto a favor da única concelleira do BNG.

“Se volvemos a un marco onde aceptemos uns consensos básicos, si poderemos chegar a un acordo”, comentou o alcalde coruñés, que confía en poder chegar a un acordo co resto de grupos, tal e como sucedeu finalmente en Santiago, onde este luns se aprobou por unanimidade o réxime de organización da casa do concello compostelano.

De non chegar a un acordo antes do día 20, data límite para que a organización da Casa do concello coruñés estea definida, prorrogaríase o acordo do 2011, de acordo ao informe do secretario xeral do Concello, ao que fixo referencia o rexedor coruñés.