A Festa da Ameixa de Campelo celebrarase o 19 e 20 de setembro

A Concellaría de Turismo do Concello de Poio informa sobre as novas datas de celebración da Festa da Ameixa 2015 de Campelo. A Festa da Ameixa, que este ano celebrará a súa XXVIII edición queda aprazada ata o vindeiro mes de setembro. O evento gastronómico, que terá lugar os días 19 e 20 de setembro tivo que ser aprazado ó prolongarse o peche da ría de Pontevedra ó marisqueo durante 25 días.

A Concellaría de Turismo, despois de barallar diferentes datas para a celebración do evento, acordou aprazalo ata esa nova data, tendo en conta o que supón a reorganización dun evento destas características, o ter que contar coa dispoñibilidade dos grupos musicais contratados, así como dos recursos materiais e humanos necesarios para a posta en marcha dun evento destas características.

Nese sentido, as novas datas escollidas semellan unha boa alternativa o ser aínda setembro un mes con un elevado volume de turistas no noso municipio.

Dende A Concellaría de Turismo confiamos en que a nova apertura da ría ó marisqueo poida ter continuidade no tempo e que a Festa da Ameixa poida seguir contando co produto local como protagonista dun dos eventos gastronómicos máis antigos e importantes do noso municipio.