Xulio Ferreiro xustifica a súa ausencia na ofrenda do Reino de Galicia nunha cuestión de programa

O alcalde da Coruña, Xulio Ferreiro, xustificou nunha “cuestión de programa” a súa ausencia na ofrenda do antigo Reino de Galicia, en declaracións aos medios á súa chegada ao Concello da Coruña. A preguntas dos xornalistas, tras as críticas da alcaldesa de Mondoñedo, Elena Candia (PP), dixo que a ausencia obedece á forma na que a Marea entende “a relación entre as institucións públicas e as relixiosas, a Igrexa neste caso”. “Entendiamos que non era o sitio para o alcalde da Coruña”, engadiu.

Tras varias entrevistas radiofónicas, Ferreiro acudiu á Casa do concello, onde xa o sábado a Marea mantivo unha reunión de traballo tras o acto de investidura da nova Corporación municipal.

CHAMADA DE FEIJÓO

O novo alcalde da Coruña precisou, sobre as súas primeiras medidas, que, tras asinar o decreto de delegación de competencias, para nomear aos concelleiros que forman parte do goberno, a súa intención era “devolver a chamada” que, segundo explicou fíxolle o presidente da Xunta, Alberto Núñez Feijóo, e que non puido atender.

“Hoxe é día de saudarnos, de coñecernos, porque nunca falamos”, indicou preguntado se tiña algunha petición para o presidente. Mentres, sinalou que a súa intención é chegar a traballar á Casa do concello “como calquera” e polos seus propios medios.

“Ás veces andando, outras co transporte urbano e outras no meu vehículo propio”, explicou. Por outra banda, dixo que unha das primeiras reunións será coa asesoría xurídica.