Tres días de loito oficial no Corgo pola morte dun brigadista

O Concello do Corgo (Lugo) decretou este domingo tres días de loito oficial pola morte dun axente forestal tras sufocar na tarde deste sábado un incendio en Vilamaior, no municipio lucense de Guntín. En concreto, o brigadista falecido, Enrique Casanova, era o número dous do BNG no Concello do Corgo e exercera de concelleiro durante 16 anos, segundo confirmou o alcalde do devandito municipio, José Antonio Ferreiro.

Fontes da Garda Civil indicaron que, tras sufocar o incendio, o brigadista abandonou o lugar en coche ao sentirse “indisposto”.

Deste modo, este axente forestal non faleceu no lugar do incendio, senón que aconteceu despois. De feito, todo apunta, segundo precisou o rexedor do Corgo, a que as causas da morte “naturais” ou debido a un infarto. Con todo, subliñou que, de momento, están pendentes dos resultados da autopsia que se realiza este domingo.

O Concello do Corgo celebrou este domingo pola mañá un pleno, no que decretou un total de tres días de loito oficial pola morte de Enrique Casanova, concelleiro polo BNG dende había 16 anos. Así mesmo, o rexedor do Corgo relatou que, a partir das 13,00 aproximadamente, suspenderanse os actos da Feira Cabalar de Adai.