Rocío Mosquera visita as obras de ampliación do CHUO iniciadas hai un ano

A conselleira de Sanidade, Rocío Mosquera Álvarez, destacou na súa visita ás obras de ampliación do Complexo Hospitalario Universitario de Ourense, que dende que se iniciaron as obras no mes de xuño do pasado ano, xa está construído máis do 70% da superficie do novo edificio. De acordo co proxecto, esta primeira fase dos traballos afecta ao Bloque de Hospitalización, que quedará concentrado nun único edificio fronte aos tres actuais, ben comunicado coas áreas de urxencias, consultas, probas diagnósticas e quirófanos. Na primeira fase tamén se creará unha área de servizos xerais (con cociña, mantemento, vestiarios, zona de residuos, mortuorios e almacéns), unha área de docencia e investigación, e unha área de aparcadoiro articulado en tres andares con arredor de 700 prazas, das cales 570 serán de uso público e 127 para persoal do complexo.

No mes de xullo, finalizarase a estrutura do andar 7, cumprindo así cos requerimentos dos fondos europeos, segundo anunciou a conselleira de Sanidade. Rocío Mosquera lembrou que coa obra de ampliación, o Complexo Hospitalario Universitario de Ourense ocupará unha superficie total construída de 52.000 m2, dos que máis de 24.000 m2 corresponden á área de hospitalización. É dicir, “o ratio de incremento superficie do hospital será de máis dun 61% respecto do estado actual”, afirmou Mosquera.

A obra foi adxudicada en febreiro de 2014 por un importe de máis de 41 millóns de euros, segundo lembrou a titular de Sanidade durante a visita ás obras na que estivo acompañada polo delegado territorial da Xunta en Ourense, Rogelio Martínez González, e a xerente de X.I. de Ourense, Verín e o Barco de Valdeorras, Eloína Núñez Masid

En concreto, durante estes meses de actuación, “procedeuse á apertura dun novo vial de acceso ao heliporto e á instalación de dous módulos provisionais para o persoal, que acollen aos Servizos de Aprovisionamentos, Contabilidade, Calidade, Investigación, Docencia, Subdirección de Sistemas de Información, Fundación Biomédica Galicia Sur, Xestión de Axendas e Servizo Técnicos de Obras” afirmou Mosquera Álvarez.

Tamén esta rematado un aparcadoiro de persoal, e instaláronse os módulos da zona de administración e dirección de obras e o derribo do Edificio Administrativo. Ademáis, se procedeu ao derribo do edificio administrativo e as actuacións relacionadas co traslado da Central de Gases;e a apertura dunha nova entrada na fachada sur.

Hospital innovador e punteiro

Rocío Mosquera salientou que a ampliación do CHUO “vai supoñer unha mellora substancial na prestación da asistencia sanitaria á cidadanía deste área” e engadiu que “Ourense contará cun hospital innovador e punteiro que será referencia tanto na comunidade como no resto de España”. O edificio terá sete plantas e contará cun total de 14 unidades: nove son polivalentes médico-cirúrxicas, unha de psiquiatría, unha de paliativos, unha de oncoloxía e dúas unidades innovadoras, integradas no proxecto H2050.

Unha vez rematado este novo edificio o Complexo terá unha capacidade máxima de arredor de 930 camas (116 máis que as actuais) repartidas a razón de 640 en unidades polivalentes, 94 en unidades específicas, 64 en unidades de críticos, e as restantes noutras unidades. Así mesmo, o 60 por cento das habitacións das novas unidades serán individuais.

Tendo en conta que Ourense ten a poboación máis envellecida de España, e por tanto un número elevado de pacientes pluripatolóxicos e crónicos, o novo edificio de hospitalización estará orientado ao desenvolvemento e innovación coa asignación de dúas plantas e espazos específicos para a innovación, en colaboracón coa universidades e empresas de tecnoloxía. Todo co fin de desenvolver ferramentas que faciliten a hospitalización na casa e polo tanto que a maior parte da nosa poboación maior de 65 anos reciba teleasistencia no seu domicilio sen necesidade de estar hospitalizado.

Todo isto contribuirá a afianzar a principal liña de investigación en novas modalidades de atención ao paciente crónico, sendo Ourense un escenario demostrador que se adiante ás medidas de España e Europa.

Deste xeito, Ourense disporá dun hospital “intelixente”, que aproveitará o potencial das tecnoloxías da información para mellorar a xestión dos servizos de urxencias de todos os niveis asistenciais, reducindo esperas, axustando os recursos aos picos de demanda e, en definitiva, mellorando o servizo que se presta ao paciente. Para iso implantarase un sistema integral de xestión organizado arredor dos pacientes e dos recursos co fin de maximizar a eficiencia e a seguridade.

O novo complexo tamén se caracterizará tamén por ser “autosustentable”, é dicir, contará cun equipamento enerxético que lle permitirá autoxerar parte da enerxía que precisa e consumir o resto da enerxía necesaria a través de fontes renovables e máis eficientes.