Rafael Louzán considera un esperpento o acontecido na Deputación de Lugo

O presidente en funcións da Deputación de Pontevedra e do Partido Popular na provincia, Rafael Louzán, considerou que o acontecido na Deputación de Lugo, co pacto entre PSOE e o BNG, “foi un esperpento”, “unha guerra de baixos fondos”. Louzán criticou este venres que, con só dous deputados o BNG “chantajee” a un Partido Socialista “débil e sen liderado”, que ten once deputados, para “que non goberne o que gañou con 12”. “Nesa chantaxe, no colmo da humillación, o PSOE entregou a cabeza dun compañeiro que non lle satisfacía ao Bloque”, asegurou.

Ao respecto, acusou á formación nacionalista de non ser “coherente” xa que pretende gobernar nas deputacións e, ao mesmo tempo, “liquidar e enterrar” estas institucións. “Paréceme razoable que coa representación que teñen queiran marcar pauta pero son incoherentes coa liña que teñen en contra das deputacións”, apuntou.

Así mesmo, para Rafael Louzán, o acontecido esta semana na Deputación de Lugo demostra que o Partido Socialista “está disposto a queimar na cacharela, como na Inquisición, os seus ou a quen sexa con tal de tocar poder”.

Para o presidente da Deputación pontevedresa, o único que quedou “claro” en Lugo é que quen goberna é o que máis votos ten o Partido Popular, polo que reprochou que “a interpretación dos resultados electorais non a poden facer os partidos políticos senón a propia lei”.

ACTUACIÓN DE BESTEIRO

Ademais, Louzán asegurou que a actuación do alcalde de Becerreá, o socialista Manuel Martínez, votándose a si mesmo, lle parece “coherente” aínda que “deixou en evidencia a Besteiro na propia casa na que gobernara”.

“Se iso lle pasa ao Partido Popular, estalle a pedir a cabeza automaticamente ao responsable político. Sobre todo se ese responsable político quere ser líder dunha alternativa para gobernar Galicia”, sinalou.

CUSTO DOS BIPARTITOS

Na súa intervención, Louzán tamén sinalou que o goberno da Deputación de Pontevedra, cunha provincia de 1 millón de habitantes, ten un custo de 740.161 euros. Fronte a iso, indicou que a provincia de Lugo, con 300.000 habitantes, tiña un goberno na súa institución provincial que custa 1.403.008,38 euros. “Comparen”, dixo Louzán “os gobernos de coalición custan o dobre, como mínimo”.

Respecto á situación para alcanzar un pacto de goberno en Pontevedra, asegurou non ter “noticias”. “Parece que o BNG está a esixir a Deputación da Coruña a cambio de que a le da de Pontevedra ao PSOE”, cuestionou.

Por último, preguntouse se o BNG será “congruente” nas súas esixencias coa candidata do PSOE para presidir a Deputación de Pontevedra, o tenente de alcalde de Vigo, Carmela Silva, xa que recordou que “ten aberto un expediente dende o anos 2012 dentro do Partido Socialista por acumulación de cargos”.

“O cambalache está servido, a chantaxe tamén e a política para optar ao poder ten un prezo: pasar por enriba de quen sexa, incluída a lista máis votada”, sinalou Louzán.