Rafa Luz non continuará no Rio Natura Monbus Obradoiro

Rafa Luz non seguirá vestindo a camiseta do Rio Natura Monbus Obradoiro na tempada 2015/16, e queda totalmente libre para asinar polo equipo co que alcance un acordo. O base de 1’88 metros e 23 anos completou tres tempadas en Liga Endesa no conxunto obradoirista, do que era un dos capitáns, con importantes logros colectivos como a clasificación para o Playoff conseguida en 2013. No último exercicio, no que disputou 33 partidos, promediou 6.6 puntos (50% en tiros de dous, 36% en triplos e 80% en libres), 3.6 asistencias, 1.1 recuperacións e 2.4 perdas en 21.5 minutos de xogo.

O club quere recoñecer publicamente a entrega e o compromiso do hispano brasileiro, que se marcha como líder histórico en asistencias na historia do club (345), á vez que lle desexa o mellor no devir da súa carreira. 

Pola súa banda, o xogador transmitiu o seu desexo de agradecemento “á afección, ao club, ao seu adestrador e moi especialmente ao presidente, Raúl López”, á vez que desexa “os maiores triunfos para o equipo a próxima tempada”.