O Rio Natura Monbus Obradoiro chega a un acordo co BK Khimik e Artem Pustovyi para a cesión do xogador por tres tempadas

O pivote  Artem Pustovyi, de 2,16 metros e 22 anos, será xogador do Rio Natura Monbus Obradoiro durante as próximas tres tempadas, segundo o acordo de cesión ao que chegaron o xogador, o Khimik – propietario dos seus dereitos deportivos–  e o club galego. O xogador, internacional por Ucraína U18, U20 e Absoluto (disputou o pasado Mundial de Baloncesto de España 2014), acaba de proclamarse campión da liga do seu país, promediando na competición 10.5 puntos, 4.8 rebotes e 1.7 tapóns en 18 minutos de xogo. 

Nacido en Sofiivka (Ucraína), levaba toda a súa carreira no BK Khimik, co que disputou competicións europeas como a Eurocup (2013/14) ou a Eurochallenge (2011/12 e 2012/13). 

“Con Artem adquirimos principalmente un proxecto de xogador, aínda que pensamos que en pouco tempo poderá axudarnos a conseguir os nosos obxectivos. Aínda está en plena forma física e técnica, pero tamén pensamos que elixiu o lugar adecuado para engadir á súa capacidade de traballo, mobilidade e envergadura, outros recursos técnicos. Agradecemos ao BK Khimik, club no que se formou, as facilidades mostradas para chegar a un acordo e asociarse á nosa visión”, afirma o director xeral do club, José Luís Mateo.