O PSOE acepta analizar as condicións do BNG pero mantén que Silva debe presidila

O PSOE mostrouse disposto a “analizar” as condicións que formula o BNG para chegar a un acordo na Deputación de Pontevedra, e acabar coa etapa de Louzán (PP) á fronte da institución, aínda que mantén que Carmela Silva debe ser a presidenta. En declaracións aos medios, o responsable provincial do partido, Santos Héctor Rodríguez, afirmou que os socialistas tiveron coñecemento “polos medios” de que o BNG “formula unhas medidas” para a negociación”. “O que esperamos é que nos faga chegar ese documento, analizarémolo, estudaremos e contestaremos”.

O secretario provincial do PSdeG insistiu en que o seu partido está “aberto ao diálogo” cos nacionalistas, e a dar “todas as facilidades para falar e acordar, como ten que ser, como pediron os cidadáns”.

Así mesmo, sobre a posibilidade de que o BNG impoña certas condicións para os investimentos provinciais nos Concellos (deixando fóra a Vigo e Pontevedra, que dependerían de convenio bilaterais), Santos Héctor reiterou que primeiro estudarían o documento e as propostas que os fagan chegar os nacionalistas.

Sobre a presidencia da Deputación, a proposta de que sexa para Carmela Silva parece innegociable para os socialistas. Preguntado polos medios acerca desta cuestión, Santos Héctor Rodríguez remitiuse ás súas declaracións de hai unhas horas, nas que recordou que a candidatura de Silva foi formulada en campaña electoral, e que foi avalada polo respaldo cidadán (a lista de Caballero, na que Silva é segunda, obtivo 17 edís en Vigo).