O Porto de Vigo acolle o primeiro embarque a Francia de vehículos Renault das fábricas de Valladolid e Palencia

O Porto de Vigo acolleu hoxe o primeiro embarque a Francia de vehículos fabricados nos centros de Renault en Valladolid e Palencia. O Presidente da Autoridade Portuaria de Vigo, Ignacio López-Chaves, asistiu xunto a responsables da naviera Suardíaz e o operador loxístico de Renault, CAT, a operativa de embarque, onde afirmou que se trata dun salto “moi importante” para o Porto de Vigo, que está a ampliar a súa área de influencia, ao captar tráficos doutras zonas de España, o que suporá o incremento de embarque de vehículos desde Vigo.

“Somos un porto moi competitivo”, destacou, á vez que agradeceu o “excelente labor” que está a levar a cabo Suardíaz, a naviera que explota actualmente a liña entre Vigo e Nantes-Saint Nazaire, e que logrou ampliar o seu servizo e o seu ámbito de actuación e a capacidade de captar outros tráficos máis aló da contorna de Vigo e Galicia.

Pola súa banda, o Director Comercial de Flota Suardíaz, Marcos Duato, subliñou a importancia de contar co apoio dun segundo fabricante -en referencia a Renault-, a través do seu operador loxístico CAT, o que nos permite ampliar a carteira de clientes desta liña con Francia e mostra as vantaxes que este servizo pode ofrecer a futuros clientes”.

Para Suardíaz, trátase “dun gran paso adiante” que esperan “permita consolidar o servizo” que prestan actualmente entre os Portos de Vigo e Saint Nazaire.

Tras o embarque de hoxe, de ao redor de 170 vehículos Renault con rumbo a Francia, Suardíaz espera alcanzar un volume de aproximadamente 30.000 vehículos anuais, que serán exportados desde a dársena viguesa, aínda que esta cifra podería verse incrementada dependendo da acollida que teñan os modelos que se van a transportar. 

Estes vehículos, que ata agora viaxaban por estrada, comezarán a utilizar a Autoestrada do Mar que, desde o pasado mes de xaneiro, incrementou o servizo ro-ro entre os portos de Vigo e Saint Nazaire a un total de tres escalas semanais.

Estas unidades distribuiranse ao mercado francés xunto co volume procedente de Turquía, que xa é usuaria da Autoestrada do Mar.

A utilización do segundo barco no servizo, que permitiu aumentar tanto a frecuencia como a capacidade, foron determinantes na decisión de Renault e CAT, operador loxístico do fluxo.

Para a Autoestrada Vigo-St Nazaire é moi importante poder contar co apoio doutros fabricantes e operadores loxísticos como Renault e CAT, tanto para o transporte de vehículos como para os tráficos de aprovisionamento das fábricas.

Os vehículos embarcados hoxe na Terminal Ro-Ro do Porto de Vigo chegaron por ferrocarril desde as factorías de Palencia e Valladolid ata O Porriño e desde alí foron transportados a Bouzas en camión.