O jazz invade a Praza da Quintana durante doce horas

Ciclo de jazz na praza da Quintana

A oitava edición do ‘Ciclo 1906 de Jazz’ finaliza este venres cun maratón na Praza da Quintana de Santiago, no que ata sete formacións musicais tocan de forma ininterrompida para abrir este xénero “a todo o mundo”. “Clausuramos o ‘Ciclo 1906 Jazz’ da mellor forma que se nos ocorre, que é cun maratón no que sete artistas estarán a tocar para que todo o mundo que queira poida gozar dunha experiencia jazz combinada, polo seu posto, da nosa cervexa 1906”, explicou en declaracións o responsable de mercadotecnia de Hijos de Rivera, Santiago Miguélez.

A xornada arrancou ás 12,00 horas coa actuación de Roberto Somoza Trio, saxofonista e compositor que colaborou con artistas como Antonio Cal, Baldo Martínez ou Lucio Godoy. Despois, foi a quenda de Felipe Villar Trio, guitarrista galego que gravado con bandas como Alberto Vilas Quinteto ou Rúa da Alegría.

Xa pola tarde, os encargados de poñer música á emblemática praza son Kin García Trio, considerado un dos nomes clave da escena musical galega; a artista que combina música clásica, rock e jazz, Mónica de Nut; o grupo de funk Cats and Monkeys; e o guitarrista André Fernándes.

Pecharán a xornada, a partir das 22,30 horas, Los Hot Chocolates, un grupo coruñés que ofrece un espectáculo “eminentemente festivo”, no que combinan o positivismo do jazz máis tradicional e a diversión do swing.

O JAZZ E 1906

Para Santiago Miguélez son “tres” as razóns que unen o jazz coa cervexa 1906. Así, en primeiro lugar, asegurou que “ambos os dous” destacan por ser “auténticos”. “O jazz respira polos catro costados autenticidade, ao igual que a nosa cervexa”, apuntou.

Así mesmo, considerou que “quizais” “ámbolos dous son para entendidos”. “Quen mellor entende o jazz é quen entende de música, do mesmo modo que a nosa cervexa é para moi cervexeiros”. “E, de novo, ambos os dous son para gozar de forma pausada, tranquila. A 1906 é unha cervexa extra, de moita calidade, para tomar dunha forma relaxada”, sinalou.

Este maratón de 12 horas, retransmitido a través da aplicación Periscope, pon o broche final ao oitavo ciclo 1906 Jazz que levou a un total de 19 artistas deste xénero musical por 14 espazos estendidos ao longo da xeografía española.