O Igape destaca as oportunidades de negocio que se presentan en Marrocos

O director do Igape, Javier Aguilera, salientou hoxe as oportunidades de negocio en eidos como a construción e as obras públicas no mercado de Marrocos, ao que exportaron durante o pasado ano 525 empresas galegas.

Durante a súa participación nun seminario sobre a contratación pública en Marrocos, o director do Igape destacou que as exportacións galegas a este mercado sumaron o ano pasado 511 millóns de euros, un 12% máis que o ano anterior. O país ocupou en 2014, apuntou Aguilera, o octavo lugar no ránking dos principais clientes das empresas galegas.

Aguilera destacou que case o 30% das empresas galegas que venden en Marrocos son exportadoras regulares, isto é, compañías que exportaron de forma continuada durante polo menos os últimos catro anos, e amosou o seu convencemento de que as relacións económicas con Marrocos seguirán medrando durante os próximos anos.

No seminario, organizado conxuntamente polo Igape e a CEG, participaron responsables da plataforma empresarial de Galicia en Marrocos, e expertos nos procedementos de licitación e contratación pública no país do norte de África.

O seminario sobre a contratación pública en Marrocos forma parte dun ciclo que comezou con encontros sobre os mercados de Colombia e Rusia, e que seguirá, o próximo día 18, cun encontro técnico sobre oportunidades e tendencias no mercado chinés.