O Colexio de Veterinarios de Lugo di que o detido por introducir droga en cachorros non tiña a titulación

O Colexio Oficial de Veterinarios de Lugo informou de que o venezolano detido este martes en Galicia por tratar de introducir droga en Estados Unidos a través de implantes en cachorros que se enviaban dende Colombia non tiña o título en vigor para exercer na Comunidade.

Segundo explicou a entidade, o propio Colexio de Veterinarios denunciou ao home, asentado en Santa Comba, a finais de 2013 por intrusismo profesional e falsificación de documentos. A denuncia ampliouse despois a outro veterinario que supostamente encubriuno e a un establecemento comercial no que traballaba.

Ao colexio cónstalle que o detido chegou a matricularse na Facultade de Veterinaria de Lugo, centro do que aínda hoxe é “oficialmente alumno”.

Andrés L.E., de 33 anos e de nacionalidade venezolana, foi detido na localidade coruñesa de Santa Camba en virtude dunha petición de extradición cursada por Estados Unidos por un suposto delito de tráfico de drogas.

Segundo os axentes que o detiveron, o home transportaba heroína líquida dende Colombia ata Estados Unidos mediante implantes que colocaba a cachorros de can que, posteriormente, enviaba como mascotas a este país.