Enviar a un amigo
Opinar
ImprimirO BNG formula un programa de mínimos para dar a presidencia da Deputación de Pontevedra ao PSOE
O voceiro do grupo provincial do BNG, César Mosquera, resumiu coa expresión “caciqueo cero” o “programa de mínimos” para a nova etapa da Deputación de Pontevedra, de modo que haxa un “cambio profundo” co PSOE na presidencia da institución. Nunha rolda de prensa na sede da administración provincial, un feito inusual cargado de simbolismo, Mosquera presentou o documento co “posicionamento do BNG” que os nacionalistas porán sobre a mesa nas próximas negociacións para formar goberno.
Un texto titulado ‘Pola equidade e transparecia’ que está distribuído nos seguintes apartados: principios xerais de funcionamento, corporación, plans provinciais, actuacións propias da Deputación, novas áreas a potenciar e, finalmente, medidas organizativas.
Mosquera destacou que é a primeira vez na que unha forza política redacta un programa de mínimos para o goberno da Deputación, e advertiu de que “calquera que queira contar co apoio expreso do BNG terá que contar con eles”.
PROPOSTAS
Os nacionalistas recoñecen que algunhas delas son propostas “moi xenéricas”, e outras “presentan dificultade”, como por exemplo as transferencias á Xunta del Centro Príncipe Felipe, da Escola de Canteiros, Areeiro, Mouriscade e o Campamento da Lanzada.
Entre as liñas vermellas que marca o Bloque figura a eliminación do 20% de reserva do presuposto para repartición polo presidente de xeito discrecional. Un “excesivo presidencialismo” da institución que quere erradicar.
Ademais, pon como condición que nin Vigo nin Pontevedra poidan optar aos plans xenéricos da Deputación para os concellos da provincia. As dúas grandes cidades terían que negociar convenios bilaterais coa institución.
Mosquera avogou por prestar servizos desterrando o “caciquismo”, polo que avisou de que “de ningún xeito” consentirán revanchismo político nos investimentos da Deputación.
Con estas premisas, os nacionalistas estarían dispostos a apoiar a investidura dun “presidente ou presidenta” do PSdeG-PSOE, que polo momento se perfila como “a posibilidade máis probable, pero non quere dicir que segura”, segundo admitiu o deputado provincial do BNG.
