Non achega novidades a declaración das novas testemuñas do ‘caso Jimmy’

Novas testemuñas do ‘caso Jimmy’, o siareiro radical dos Riazor Blues que foi asasinado nunha liorta contra ultras do Frente Atlético o pasado 30 de novembro, non achegaron datos novos á investigación que trata de esclarecer o sucedido nas inmediacións do Vicente Calderón tras a pelexa.

Este luns declarou ante o xuíz de Instrución número 20 de Madrid un policía municipal, un bombeiro, un axente de mobilidade e dous membros do Samur que estiveron no Manzanares a mañá en que morreu Francisco Javier Romero Taboada, alcume ‘Jimmy’.

Segundo explicaron fontes da defensa, nas declaracións de hoxe “non se abre ningunha nova vía nin canle de investigación” e as testemuñas ratificaron as declaracións das persoas que pasaran antes polo xulgado número 20 para tratar de esclarecer o sucedido a noite do 30 de novembro.

Nestas declaracións ratificouse que foron dous os siareiros galegos que foron botados ao río polos ultras do Atleti. O primeiro deles chámase Santiago e caeu pola zona do arboredo, pero puido saír polo seu propio pé. En cambio o falecido Javier Romero Taboada, alcume ‘Jimmy’, caeu na zona dos toldos e foi rescatado por un bombeiro á altura da presa seis do río.

Ademais, persoal do Samur volveu confirmar que ‘Jimmy’ se atopaba inconsciente cando foi rescatado do río, como constatou a testemuña deste servizo, e a policía declarou que “non viu caer a ninguén” ao río, sinalaron pola súa parte fontes da acusación.

Nas declaracións deste luns, as novas testemuñas, que sumados aos precedentes ascenden a preto dunha vintena, non botaron nova luz sobre o sucedido nos arredores do Vicente Calderón e a día de hoxe, non hai declaracións sinaladas.