José Blanco considera que Lugo perde un grande alcalde

O exdirixente socialista José Blanco, actualmente deputado no Parlamento europeo, lamentou este venres que Lugo “perde un grande alcalde” coa renuncia de Xosé López Orozco, pero incidiu en que, con este xesto para facilitar a conformación dun goberno de esquerdas, o seu “amigo” demostrou “a súa grandeza”.

A preguntas dos xornalistas coincidindo coa súa presenza nun encontro de Europe Direct no Pazo de Mariñán, en Bergondo (A Coruña), o exministro de Fomento considerou “lóxica” a creación dun goberno “progresista” en Lugo, pois así decidiuse o pasado 24 de maio.

“Non sería lóxico que, habendo unha maioría progresista, gobernase unha minoría de dereitas”, sentenciou, convencido de que a renuncia do seu “gran compañeiro e grande amigo” Orozco evidencia que soubo interpretar “a vontade da cidadanía”.

Por iso, considerou que o alcalde en funcións de Lugo “se fixo máis grande” coa súa renuncia. “Aínda sendo inxusto para el, gaña Lugo, gañan os cidadáns que quixeron unha maioría progresista”, agregou, para remarcar: “aínda que sexa moi inxusto para o amigo López Orozco”.