Hernández asegura que Santiago estará representada na Ofrenda ao Santísimo

O alcalde en funcións do Concello de Santiago, Agustín Hernández, asegurou este xoves que a corporación compostelá participará o vindeiro domingo na Ofrenda ao Santísimo Sacramento que se celebra en Lugo con representación de, “polo menos”, os concelleiros do Partido Popular.

Así o asegurou Hernández a preguntas dos medios tras facer balance dos seus 11 meses de goberno e por mor da decisión anunciada polo futuro rexedor compostelán, Martiño Noriega, de non acudir a este acto organizado pola Diocese de Lugo, e no que Santiago debía actuar como oferente, aludindo ao carácter “laico” do concello.

“Considero que é un empobrecemento do noso patrimonio cultural inmaterial”, criticou Agustín Hernández en relación á decisión de Noriega, á vez que asegurou que o “acto protocolario” da Ofrenda, que realizan tradicionalmente as sete cidades do antigo Reino de Galicia, “está por encima das crenzas individuais”.

PARA TODA A CORPORACIÓN

No entanto, o rexedor en funcións asegurou que a invitación para participar neste acto “vai dirixida a toda a corporación”, polo que garantiu que esta “estará representada polo menos polo portavoz da oposición”, cargo que Hernández ocupará o domingo tras a toma de posesión do novo goberno o sábado.

Ademais de garantir a súa presenza persoal, como edil, Agustín Hernández asegurou que “os concelleiros do PP” en Santiago “teñen previsto acudir ao acto” tamén en representación da cidade.

POSTUREO POLÍTICO

Na mesma liña, o alcalde en funcións instou ao futuro rexedor a “reflexionar” sobre a “porcentaxe de votos que representa a súa formación” e dos desexos do conxunto dos cidadáns de Santiago, “diferenciando as súas crenzas relixiosas persoais da institución á que representa”.

Así, Agustín Hernández subliñou que esta decisión, así como outras que Noriega poida tomar en relación a actos relixiosos, “pode significar algo negativo para o seu concello” e atribuíuna a unha “mostra de postureo político”.