Grandes rexistros na 42 edición do Trofeo Boa Vila da Sociedade Ximnástica

As pistas de atletismo do CGTD, viron un gran espectáculo no XLII Trofeo Boa Vila de atletismo, que patrocinou o Instituto Municipal de Deportes e que contou coa presenza de máis de 150 atletas de toda a Galicia. Destaca á atleta do Barbanza, Iria Forján, que quedou a tan só 1 centímetro do record galego absoluto; con 5,98 levou o trofeo á mellor marca da competición.

Os atletas da Sociedade Ximnástica conseguiron un total de 9 vitorias parciais, resaltando a Víctor Gallego que con 52,18 no lanzamento de disco, foi a mellor marca masculina do Trofeo; tamén o fixeron moi ben as cadetes Lucía Ferrer e Lucía Cardesín, Ferrer impúxose nos 100 metros valas sub18 con 16.04 e Cardesín nos 600 metros cadete con 1.40.29; ambas con marca de clasificación para o nacional cadete. As outras vitorias foron para: Darío Costas nos 200 metros con 22.48, mágoa do vento contrario; Alfonso Pérez nos 400 metros con 50.97; Xavier Rodríguez nos 2.000 metros obstáculos con 6.29.62; Marco Martínez nos 100 metros valas cadete con 16.29; Alex Solla nos 110 metros valas con 15.98 e Santi Ferrer Alonso no salto con pértega con 4.45.

O resto de vitorias parciais repartíronse entre os Clubs participantes, por parte da Ría de Ferrol, Lucía Fernández nos 3.000 metros cunha gran marca de 9.42.33; do FC Barcelona, Saleta Fernández en salto de altura con 1.72, outro magnifico rexistro; do San Narciso, Paula González no martelo Sub18 con 38.56; do Lucus, Faisal Dauda no disco júnior con 36.63; da Asociación Deportiva Mazí, Roi Estévez nos 600 metros cadete con 1.32.02, do Pinarium, Gustavo Santiago nos 1.500 metros con 4.19.09 e do Feminino Celta, Laura Chapela nos 200 metros con 26.59.

Dentro de dúas semanas a Sociedade Ximnástica organizará o Trofeo Cidade de Pontevedra, Memorial Celso Mariño; que será moi propicio de cara á preparación do galego absoluto, que se disputará o 18 de xullo.