Dúas mulleres foron evacuadas debido a un incendio na súa vivenda en Santiago

Dúas mulleres de 18 e 55 anos foron evacuadas a un centro hospitalario debido a un incendio rexistrado no interior dunha vivenda en Santiago de Compostela. Segundo informou o 112 Galicia, uns minutos antes da media noite rexistrouse un incendio no interior dun piso na rúa Touro, en Santiago.

Debido ao incendio unha moza sufriu queimaduras nunha man, mentres que outra muller que habitaba a mesma vivenda resultou afectada pola acumulación de fume.

Os Bombeiros de Santiago sinalaron que ardeu un colchón dentro dun dormitorio. Ademais dos efectivos de extinción participaron no operativo axentes da Policía Local e Nacional.

O 061, pola súa banda, trasladou ao lugar unha ambulancia asistencial que levou ao Complexo Hospitalario Universitario de Santiago a unha moza de 18 anos e a unha muller de 55, segundo apuntaron fontes sanitarias.

PUNTO LIMPO

Por outra banda, un lume calcinou na noite do martes diversos aparellos almacenados no punto limpo de Nostián, na Coruña, segundo sinalou o 112.

Foi o propio persoal da empresa encargada da xestión dos residuos, axudados cunha retroescavadora, os que extinguiron o lume que arrasou colchóns, sofás e outros aparellos acumulados no punto limpo contiguo á Planta de Tratamento de Nostián.

O servizo de emerxencias indicou que a rápida intervención dos traballadores da empresa evitou a propagación das lapas. Foi un axente de seguridade o que se decatou do incendio uns minutos antes das 23,00 horas e alertou o 112 Galicia.