Detido en Ourense un home acusado de roubar un bolso

A Policía Nacional de Ourense detivo un home acusado dun roubo con violencia, despois de que supostamente subtraese o bolso a unha muller polo método do ‘tirón’. Segundo informaron os axentes, os feitos sucederon sobre as 12.00 horas do pasado día 30, cando unha patrulla tivo coñecemento dun ‘tirón’ que se producira na rúa Greco de Ourense.

Os axentes que acudiron á chamada interceptaron na confluencia da rúa Greco con rúa Remedios a un individuo que fuxía correndo. Tras identificalo e realizarlle un cacheo superficial, a Policía atopou no seu poder un bolso que contiña documentación da vítima.

Xa en dependencias policiais se puido confirmar que a persoa arrestada era a mesma que sobre as 14.00 horas do día anterior fora detida por un delito de furto, ao encontrárselle tras un cacheo realizado por un indicativo de radiopatrullas un teléfono móbil que fora subtraído no mes de abril.