Cangas aposta pola seguridade dos bañistas

A concellería de Medio Ambiente, Turismo e Praias ultima todos os detalles coa chegada da época estival. Seguridade, limpeza, acondicionamento ou o izado das bandeiras azuis, entre as prioridades da concelleira, Tania Castro.

Dende mañá 1 de xullo estarán operativas as tres lanchas: dúas pequenas (Salvacangas1 e Salvacangas3) e unha grande (Salvacangas4). As pequenas terán a base en Nerga e Aldán, respectivamente; e a grande patrullará co fin de asegurar aos bañistas das 38 praias. Con esta medida, puntualiza Castro “este goberno aposta por inverter na seguridade dos bañistas, homologando, equipando e asegurando as lanchas para ter así cubertas todas as praias, incluída toda a ría de Aldán”.

Por outra banda, os areais cangueses xa contan con limpeza manual diaria e limpeza con maquinaria semanal. Das trinta e oito praias, vinte e unha delas contarán así mesmo con papeleiras na mesma zona. Ao mesmo tempo, realízanse traballos de acondicionamento nas entradas cara as praias.