As entidades transfronteirizas censuran que no Cumio Ibérico non se tocase o futuro dos dous países

O presidente da Rede Ibérica de Entidades Transfronteirizas (RIET), José Maria Costa, censurou este martes que o Cumio Ibérico de Baiona (Pontevedra) non sirva para abordar “o futuro da poboación” dos dous países participantes e, en cambio, sirva para que os gobernos español e luso discutisen sobre “a débeda pública grega”.

Por iso, a través dun comunicado, a RIET considerou o encontro entre o presidente de Portugal, Pedro Passos Coelho, e o de España, Mariano Rajoy, como “o cumio da desilusión”. Neste sentido, incidiu en que foi “inútil”, porque non se trataron “propostas concretas” para os cidadáns de ambos os países e si se falou sobre un tema que era alleo aos dous países da Península Ibérica.

Así é que ironizou con que, tras “intensas” reunións e “acaloradas” discusións “sobre a nada”, o cumio só serviu para concluír que “Portugal e España están de acordo en estar en desacordo con Grecia”.

Outros dous aspectos “importantes” que destacou sarcasticamente o presidente da RIET do encontro é que a liña de alta velocidade ferroviaria do Miño “posponse indefinidamente” e que se lle dá “moita importancia” ao Camiño Portugués de Santiago, algo do que xa falaron “os presidentes da Cámara do Eixo Atlántico” no ano 2014 e cuxa candidatura a Patrimonio da Humanidade xa está presentada.

Á marxe do anterior, o tamén presidente da Cámara Municipal de Viana do Castelo criticou que representantes do “Eixo Atlántico, asociacións empresariais e universidades” non estean citados en Baiona este luns a pesar de tratarse dun encontro que se pagou co diñeiro público dos contribuíntes españois e portugueses”.