Arrinca o III Campus Obradoiro CAB – Barbanza en Boiro

O campus contará coa dirección de Pablo Vázquez  que resume quen se unirá ao nas aprendizaxes: “Teremos a dirección técnica de Dan Petts, e cos tamén adestradores como Camilo Riveiro, ex xogador e adestrador nas categorías basee do club; Anabel González, do ourensán Carmelitas; Luís Forés, do C.B. Noia; Adrián Sueiras do C.B. Rosalía; e Borja Cutrín do  A.D. Valle Inclán de Montrove. Ademais acompañaranos tamén Mark Jarram, do inglés Leicester Riders”.

O programa do Campus será moi variado e permitirá aos máis pequenos avanzar na súa formación e aos máis maiores na súa tecnificación, aclara Pablo Vázquez. “Para os máis peques imos facer adestramentos enfocándoos ao xogo, de forma máis lúdica. Para os máis maiores buscaremos unha maior tecnificación. Aínda que somos conscientes de que non é posible aprender todo en cinco días, pretendemos que os rapaces queden con pinceladas e xestos técnicos que lles axuden no futuro”.

Tamén se combinarán actividades máis aló do baloncesto. Durante estes días espéranse temperaturas cálidas, o que permitirá mesturar actividades en pista con diversión na praia. “Teremos adestramentos na praia, concursos de triplos e de tiros libres, competicións de 3×3, sesións de vídeo, partidos contra os adestradores, etc. A última noite durmiremos no pavillón, onde faremos tamén xogos e concursos”.

Ademais, o luns o Campus contará coa presenza do xogador do persoal de Liga Endesa do Rio Natura Monbus Obradoiro Pepe Pozas. “Tamén haberá máis visitas de xogadores profesionais como Arantxa Mallou,  xogadora de Liga Feminina 1 e Víctor Pérez, adestrador axudante do club obradoirista”, revela Vázquez. 

Ao redor de 60 pequenos xogadores estarán presentes en Boiro. O Campus ofrécelles a posibilidade de pasar a noite no pobo ou de transportarse cada día desde Santiago ou Padrón, momentos que compartirán cos seus compañeiros e nos que poderán desenvolver valores persoais como a convivencia ou o compañeirismo, outro dos obxectivos da cita.

Á parte das xa mencionadas firmas e institucións, o III Campus Obradoiro CAB – Barbanza non sería posible sen a axuda de Jim Sports, Vive, Unika, Gadis, Cabreiroá, Soom, Cenor e o Club Baloncesto Santa Baia.