A comisaria de ‘O primeiro Picasso. A Coruña 2015’ asina no libro de ouro da cidade herculina

Recepción á comisaria Malén Gual

A comisaria da exposición O primeiro Picasso. A Coruña 2015, Malén Gual, asinou no Libro de Ouro do Concello a petición do alcalde en funcións coruñés, Carlos Negreira, quen lle agradeceu o traballo realizado para, a través desta mostra, difundir a etapa coruñesa de Picasso no mundo.

Negreira destacou que a exposición, que tivo lugar no Museo de Belas Artes, cultivou un “éxito extraordinario” ao alcanzar os 64.490 visitantes. Apuntou que, só con esta mostra, o museo superou a súa cifra máxima de visitantes nun ano, que estaba situada desde o ano 2000 en 45.000 visitantes.

No Libro de Ouro, Malén Gual deixou a súa rúbrica e agradeceu a hospitalidade e o trato que recibiu na Coruña, “que verdadeiramente é a cidade na que ninguén é forasteiro”. Ademais, fixo un chamamento para que A Coruña “continúe nesta liña de potenciación da figura de Picasso. Esta exposición e todas as actividades realizadas este ano situaron A Coruña no mapa mundial das cidades picassianas e este é un impulso que creo que non se pode desaproveitar no futuro”, aconsellou.

A exposición encadrouse no Acontecemento de Excepcional Interese Público A Coruña 2015. 120 anos despois. As actividades enmarcadas no evento reuniron a máis de 100.000 persoas.