Xuventude organiza un campamento de verán para nenos no centro de educación ambiental Equal

A Concellería de Xuventude do Concello de Ourense organiza un campamento de verán para nenos/as e rapaces/zas, no centro de educación ambiental e albergue xuvenil Equal (Sociedade Cooperativa Galega) sito en A Barra, Coles.

A concelleira María Devesa e a presidenta de Equal, Amparo Vázquez, presentaron esta actividade, englobada na campaña de ocio e tempo libre da Concellería de Xuventude. Está destinada a menores de entre 9 e 14 anos de idade, e contará con dous turnos de cinco días cada un, de luns a venres, durante a semana do 13 ao 17 de xullo e a semana do 20 ao 24 xullo, de 9:00 a 18:30h.

O campamento está deseñado para que nenos e nenas podan desfrutar do tempo de lecer que lles outorgan as súas vacacións escolares participando en actividades creativas e de achegamento á natureza.

Desenvolveranse actividades diarias de carácter lúdico e formativo nas que a comunicación, as habilidades sociais e as relacións entre iguais a través do xogo, o teatro e a interacción coa natureza serán os elementos que favorezan a diversión, a convivencia e a cooperación. Tódolos días haberá unha actividade ecuestre, piscina, xogos cooperativos, e obradoiros (de teares, teatro, xabóns e pasta de dentes, reciclaxe, manualidades e elaboración de pan multicereais). Tamén haberá unha saída didáctica ao centro de recursos zooxenéticos de Galicia, pazo de Fontefiz.

A Concellería de Xuventude abrirá mañá, mércores, 27, o prazo para presentar as solicitudes por parte de nenos/as e mozos/as que desexen optar a unha das 44 prazas disponibles para este campamento de verán. Con todas as solicitudes presentadas realizarase un sorteo público o día 11 de xuño. As persoas interesadas neste campamento poden realizar a inscrición ou solicitar máis información na Oficina da Información Xuvenil do Concello de Ourense, sita na Praza de San Martiño nº 2, baixo dereita, teléfono 988 38 81 54.