Xunta e Concello de Ponte Caldelas mostran a súa satisfacción tras lograr a bandeira azul para a praia fluvial

Ethel Vázquez na visita a Ponte Caldelas. Foto: Concello de Ponte Caldelas

A Xunta e o Concello de Ponte Caldelas (Pontevedra) mostraron este xoves a súa satisfacción despois de que a praia fluvial da Calzada fose distinguida con bandeira azul, converténdose, así, no primeiro areal de augas interiores galardoado en Galicia pola Asociación de Educación Ambiental e do Consumidor (Adeac).

En declaracións aos medios no marco dun paseo polo río Verdugo, ao seu paso por esa localidade pontevedresa, a conselleira de Medio, Ethel Vázquez, remarcou que a consecución da bandeira azul foi froito da “aposta polo traballo conxunto”.

Durante o acto, organizado pola Sociedade de Caza e Pesca de Ponte Caldelas, Ethel Vázquez cualificou de “excepcional” a calidade da auga do río, e felicitou o alcalde da localidade polo galardón.

“Debemos felicitarnos todos e estar todos contentos”, aseverou, e fixo fincapé en que Galicia se segue mantendo como a comunidade autónoma con máis bandeiras azuis en 2015, con oito bandeiras máis que no ano anterior.

“ENORME SATISFACCIÓN”

Pola súa banda, o alcalde de Ponte Caldelas, Perfecto Rodríguez, declarou que o galardón “é un motivo de enorme satisfacción” para todos os veciños” e para aqueles que “creron sempre na importancia de potenciar o río como recurso turístico e os valores ambientais do municipio”.

O alcalde considerou que este premio “pon de manifesto a aposta que o Concello de Ponte Caldelas fixo sempre” polo desfrute turístico harmónico dos seus recursos naturais”.