Un grupo de operadores turísticos alemáns visitan Galicia para coñecer a súa oferta enogastronómica

Un grupo de sete operadores turísticos alemáns especializados na organización de viaxes relacionados coa gastronomía poderán coñecer estes días boa parte da oferta enogastronómica do destino turístico Galicia, grazas á viaxe de familiarización organizada por Turismo de Galicia, en colaboración coa Oficina de Turismo de España en Berlín.

Deste xeito, entre os días 21 e 24 de maio, poderán coñecer os aspectos máis salientables da enogastronomía galega representantes dos operadores alemáns Studiosus Reisen, Bayerisches Pilgerbüro Studienreisen GmbH, One World Travel & Incentive, Andiamo GmbH, Lernidee Reisen GmbH, Abanico – individuell Reisen e Windrose Finest Travel GmbH.

A viaxe destes axentes turísticos comezará en Santiago de Compostela, onde visitarán o mercado de abastos e disfrutarán dun almorzo a base tapas elaboradas con produtos galegos. Tamén durante a súa estanza na capital galega realizarán unha visita ao centro histórico da cidade e percorrerán as cubertas da Catedral.

O día 22, os operadores alemáns asistirán á presentación da Ruta da Camelia, como itinerario gastronómico de Galicia e participarán nun taller de traballo coas principais empresas relacionadas co receptivo turístico en Galicia.

Logo desta reunión de traballo, desprazaranse ata a Costa da Morte, onde visitarán Fisterra, Carnota e Muros, lugares nos que manterán encontros gastronómicos en distintos restaurantes da zona.

O día 23 de maio, os operadores turísticos alemáns visitarán a cidade de Pontevedra e percorrerán a súa zona monumental cunha visita ao mercado de abastos.

Ao mediodía desprazaranse ata Ribadumia para visitar unha adega asociada á Denominación de Orixe Protexida Rías Baixas.

Ese día visitarán tamén O Grove e Cambados e navegarán pola Ría de Arousa para coñecer as explotacións de mexillón en batea. Pola tarde, visitarán dous pazos situados nas terras de Arousa, relacionados coa produción de viño e poderán coñecer parte da oferta relacionada cos xardíns da camelia.

Para o día 24 de maio, está prevista unha visita á cidade da Coruña, onde os operadores alemáns percorrerán a Cidade vella, visitarán a Torre de Hércules, o Xardín de San Carlos e a Marina.

Mercado alemán

O mercado alemán é o segundo mercado internacional máis importante para a comunidade galega, ao representar no pasado ano o 12% do total dos turistas estranxeiros que se aloxaron en Galicia.

A cifra de alemáns aloxados nos establecementos turísticos galegos superou o pasado ano os 125 mil, incrementándose nun 14,5% en relación ao ano 2013.

Polo que respecta ao ano 2015, o mercado alemán está a rexistrar tamén un importante crecemento, ao incrementar un 32,2% a cifra de viaxeiros aloxados e un 41,3% o nivel de pernoctacións nos tres primeiros meses do ano.