Un centenar de escolares visitarán este mes Ferrol dentro do programa educativo “Proxecto Terra”

Ferrol acollerá o vindeiro venres, día 8 de maio, a visita dun grupo de escolares do CPI Fonte Díaz de Touro, en A Coruña, dentro do programa educativo “Proxecto Terra” impulsado polo Colexio Oficial de Arquitectos de Galicia. Un total de 27 estudantes percorrerán diferentes lugares emblemáticos da cidade no marco desta proposta educativa que conta coa colaboración da Concellería de Turismo do Concello de Ferrol, que dirixe María del Carmen García Fraga.

Este grupo de escolares visitarán durante a xornada do venres 8 as instalacións de Exponav, a Aula de Ecoloxía Urbana ou o barrio histórico de A Magdalena. Tamén gozarán dun paseo en barco pola ría ferrolá até o Castelo de San Felipe, onde visitarán a fortaleza. “Proxecto Terra” ten como obxectivo contribuír a que os estudantes melloren o seu coñecemento sobre os espazos, a arquitectura e o territorio galego.

Ao longo do presente mes de maio, Ferrol recibirá a visita de máis dun centenar de escolares que coñecerán o patrimonio histórico e arquitectónica da cidade. Así, as próximas visitas de colexios galegos no marco deste programa educativo están previstas para os vindeiros venres 22 e 29 de maio e participarán o IES Elviña e o IES Salvaterra, respectivamente.