Telefónica leva fibra óptica ao 86% da poboación viguesa

O 86% da poboación viguesa -máis de 253.000 persoas- poderá disfutar a final de ano da fibra óptica ata o fogar de Telefónica, a tecnoloxía de datos máis avanzada do mercado. Actualmente, unhas 100.000 vivendas de Vigo gozan xa dos servizos que ofrece a FTTH: velocidades de 100 megas –que poderán ampliarse sen custo a 300 megas nas próximas semanas-, contidos audiovisuais en alta definición, videoxogos de última xeración ou capacidade para conectar varios dispositivos á vez coas mellores condicións de velocidade e calidade.

O despregamento de FTTH en Vigo supuxo a contratación de máis dun centenar de persoas e forma parte do importante esforzo investidor que a Compañía está a levar a cabo en Galicia en infraestruturas en redes de nova xeración.

Ata o momento, Telefónica dispón de cobertura FTTH (fibra óptica ata o fogar) en máis de 305.100 vivendas e zonas industriais das 6 principais cidades de Galicia – A Coruña, Santiago, Lugo, Ourense, Pontevedra e Vigo- e prevé superar, antes de 2016, as 425.287 unidades inmobiliarias conectadas a esta nova rede. Así, practicamente o 85% da poboación destas urbes – un total de 783.479 galegos- poderase beneficiar das vantaxes da fibra óptica, que destaca pola súa alta capacidade e calidade de transmisión -o sinal é inmune ás interferencias externas e ás inclemencias meteorolóxicas-, ademais de por ofrecer maior seguridade.

Nos traballos de instalación da nova rede en Galicia, para os que se contratou a case medio milleiro de persoas, Telefónica deu prioridade ao despregamento a través das conducións xa existentes co obxectivo de reducir ao máximo as obras a pé de rúa e as molestias aos cidadáns.