PP, PSOE e BNG inician en Vigo, Santiago e A Coruña unha campaña na que irrompen as ‘mareas’ e Ciudadanos

PPdeG, PSdeG e BNG elixiron as cidades de Vigo, Santiago e A Coruña, respectivamente, para os actos centrais que suporán na media noite do xoves ao venres o pistoletazo de saída na carreira cara ás urnas que culminará o 24 de maio, data na que as enquisas vaticinan o protagonismo das ‘mareas’ e de Ciudadanos.

Nesta conxuntura, o presidente do PPdeG, Alberto Núñez Feijóo, inaugurará a campaña en Vigo coa tradicional pegada de carteis. Ademais, o partido tamén organizará un acto de inicio de campaña en Ourense, ao que asistirá o líder dos populares galegos.

A idea do PPdeG é que Feijóo acuda ás cidades galegas polo menos en dúas ocasións ao longo da campaña. Tamén visitará outras localidades intermedias e pequenos municipios para “reforzar” os candidatos locais. En total, o presidente participará en máis de medio centenar de actos.

O PPdeG aclarou que Feijóo declinou varias peticións para que participase en actos electorais noutras comunidades polo seu “expreso desexo de centrarse na campaña galega”. A súa axenda, en todo caso, non será tan “intensa” como cando non gobernaba, posto que a súa “prioridade” é exercer as funcións de presidente galego.

Nunha campaña na que as enquisas formulan a posibilidade de que o PPdeG perda as maiorías absolutas que ten en Santiago, Ferrol e A Coruña, así como unha caída significativa en Vigo, o presidente do Goberno e xefe de filas do PP, Mariano Rajoy, prevé visitar Galicia o 15 de maio para asistir a actos en Vigo e Pontevedra, sen descartar outros se a súa axenda llo permite.

Pola súa parte, o número dous do PPdeG, Alfonso Rueda, ao igual que outros membros do partido, levarán a cabo unha axenda de actos de campaña paralela á de Feijóo, de forma que se poderá percorrer de forma “máis efectiva” a comunidade para “apuntalar” ao máximo número de candidatos.

PSOE: APERTURA EN SANTIAGO E PECHE EN LUGO

Pola súa parte, os socialistas galegos, con José Ramón Gómez Besteiro á fronte, planificaron os actos centrais de apertura e peche da campaña electoral en Santiago e Lugo, respectivamente, segundo ratificaron fontes do partido consultadas.

Se os populares teñen polo momento unicamente a confirmación de Rajoy, os socialistas esperan a Pedro Sánchez en Vigo a primeira fin de semana de campaña, pero tamén a outros dirixentes estatais como o expresidente do Goberno José Luis Rodríguez Zapatero, quen participará nun acto o 19 na Coruña, onde acompañará a candidata socialista á alcaldía, Mar Barcón.

En Galicia, á marxe da visita de Zapatero, está confirmada a presenza do voceiro do PSOE no Congreso, Antonio Hernando; da presidenta do partido a nivel federal, Micaela Navarro; e do responsable de Organización socialista, César Luena, entre outros.

CAMPAÑA “SOBRIA E AUSTERA” DO BNG

Pola súa parte, o director de campaña e secretario de Organización do BNG, Bieto Lobeira, ratificou en declaracións que os nacionalistas celebrarán o seu acto central de apertura de campaña na Coruña e o de peche, en Vigo. “A partir de aí faremos especial fincapé nas cidades, con actos percibidos como encontros, para escoitar e falar”, sinalou.

Os nacionalistas planificaron, ademais, unha campaña “sobria e austera”, pero tamén “imaxinativa e diferente”. “A militancia será a protagonista tanto nos actos como na parte económica”, esgrimiu, para engadir que os nacionalistas confían en tocar “o conxunto da xeografía das bisbarras”.

Tras o proceso de asembleas abertas, o BNG congratúlase de pechar candidaturas “renovadas”, pero tamén reivindica a experiencia de goberno como elemento diferencial. “Alí onde gobernamos, a sociedade o referenda, o impulsa e o recoñece”, proclamou.

CIDADÁNS E OUTRAS FORMACIÓNS

Pola súa banda, tal e como confirmou o delegado territorial de Ciudadanos en Galicia, Javier Chouza, esta formación non ten previsto un acto central para a tradicional pegada de carteis.

Deste modo, cada un dos 13 concellos galegos nos que concorre C’s levará a cabo un acto propio, de índole municipal. Por exemplo, o propio Chouza, como aspirante á Alcaldía de Boiro, estará a dar inicio á campaña dende este municipio coruñés.

Así mesmo, Compromiso por Galicia abrirá a campaña na capital galega e ten previsto o acto de clausura na cidade olívica. Mentres, UPyD convocou o acto central de apertura de campaña, a pegada de carteis, na cidade de Vigo, ao igual que o PPdeG.

Pola súa banda, Xosé Manuel Beiras (Anova) aínda ten pendente de confirmar en qué actos participará no arranque de campaña, mentres que Yolanda Díaz ratificou na tarde deste martes que estará presente no acto de Ferrol en común.

Aínda que teñen algunhas candidaturas propias, os dous principais patas de AGE apostaron de forma maioritaria pola confluencia, integrándose en candidaturas cidadás e ‘mareas’. De feito, Martiño Noriega, alcalde de Teo e covoceiro nacional de Anova, deu o salto á política de Santiago e será o candidato da plataforma Compostela Aberta.